Remontada do Chantada
Un gol de Kadete na prórroga deulle a Copa aos vermellos na final contra o Taboada
Copa Deputación
O Chantada proclamouse campión da Copa Deputación Preferente-Primeira tras superar ao Taboada por 2-3 nunha final trepidante celebrada en Castro de Rei. O partido comezou co Taboada moi enchufado, dominando con claridade os primeiros vinte minutos e aproveitando as transicións ofensivas para facer dano. Gabriel anotou dous goles moi similares, ambos en xogadas ás costas da defensa chantadina, e deixaba o partido moi encamiñado para os seus intereses.
Co paso dos minutos, o Chantada foi gañando terreo, primeiro mellorando a súa colocación e despois asumindo máis protagonismo co balón. Os cambios tácticos deron resultado e o segundo tempo arrincou co 2-1, tras un centro lateral que acabou en propia porta. Ese tanto animou aos de Traste, que se foron arriba con decisión e atoparon o empate nun córner rematado por Pedro. O Taboada, malia o golpe, seguiu sendo perigoso nas contras, pero o partido chegou aos 90 minutos co 2-2.
Na prórroga, a fatiga fixo efecto en ámbolos conxuntos, e parecía que a final camiñaba cara aos penaltis. Porén, cando quedaban cinco minutos para o remate, apareceu Kadete, o capitán do Chantada, para rematar de cabeza un balón prolongado na área e pechar a remontada.
TABOADA 2 - 3 CHANTADA
SD Chantada: Adrián, Sergio, Pablo V, Manuel R, Pablo I, Miguel, Damián, Pablo F, Pedro, Xende e Pablo N. Tamén xogaron Manuel P, David, Brais, Alexandre e José R.
Goles: Gabriel (2) para o Taboada. Adrián, en propia, Pedro e David para o Chantada.
Árbitro: Álvaro Valín González.
Resultado final
| Taboada | 2 | 3 | Chantada |
