Unións Agrarias esixe a recollida do leite na comarca da Montaña lucense
O sindicato Unións Agrarias-UPA convocou este luns unha rolda de prensa onde volveron alertar da delicada situación que sofren as ganderías máis pequenas da comarca da Montaña.
En concellos como Becerreá están a darse casos onde as empresas lácteas ameazan con non facer a recollida do leite por "supostas" complicacións co transporte, algo que dende UU.AA. se ve como unha estratexia "para continuar baixando os prezos".
Na reunión participaron o responsable de coordinación sectorial, Félix Porto; o responsable do sector lácteo no sindicato, Óscar Pose, e o coordinador provincial en Lugo, Miguel Tomé. Os tres coincidiron en que se trata dun escenario "alarmante" que pode levar ao peche a moitas explotacións. "Non vamos deixar que a industria decida o camiño do sector", dicía Pose.
O vindeiro 1 de agosto renóvanse os contratos entre gandeiros e empresas
Dende esta organización comentan que o que están a facer as empresas é alegar que non poden acceder a algunhas granxas da Montaña e esixir remodelacións nas instalacións como condición para pasar. "Como se lle vai pedir aos gandeiros que fagan unha investimento desa magnitude? É un estrangulamento", comentaba Porto.
UU.AA. asegura que sinalarán as industrias responsables e que se mobilizarán se é necesario. "Sabemos que non vai quedar ningún litro de leite sen recoller, só son estratexias para pagar aínda menos", insistía Porto. Para o sindicato é un momento crucial, xa que o vindeiro 1 de agosto asínanse de novo os contratos entre gandeiros e empresas e é preciso que se arranxe esta complexa situación.
Piden ao goberno da Xunta de Galicia e ao Ministerio de Agricultura que interveñan canto antes e que activen mecanismos para que esa recollida se poida efectuar.
As ganderías ameazadas son de pequeno tamaño e están, de media, en mans de persoas maiores de 50 anos, o que complica calquera posibilidade de financiar unha reforma grande. En palabras do responsable do sector lácteo neste sindicato: "Só queren que sobrevivan as explotacións de gran tamaño, pero iso non é nin posible, nin necesario".
As ganderías pequenas aportan o 50% da produción total galega
A desaparición das ganderías pequenas é algo que preocupa enormemente aos responsables sindicais, pois supoñen o 50% da produción total galega. Pose quixo destacar que "cada ano desaparecen entre 300 e 400 explotacións na nosa comunidade".
Por outra banda, as persoas que se adican a este sector loitan continuamente contra a baixada dos prezos do leite, que agora se sitúan dous céntimos por debaixo da media estatal. Na rolda de prensa tamén se advertiu que, aínda que este problema repercuta de forma máis directa e clara na Montaña lucense, é algo que comeza a preocupar xa a nivel autonómico.
Tomé insistiu na importancia que teñen estas granxas ao longo do territorio galego. "Non só cumpren un importante papel a nivel económico e social, senón que tamén teñen unha función ambiental", di. "Estas ganderías xeran riqueza, evitan o abandono rural e protexen o territorio de desastres coma os incendios", sentencia.
