O Ensino coróase como campión da Copa Xunta infantil

Primeira infantil 

Feminina - Copa Xunta Galicia

O Ensino proclamouse campión da Copa Xunta na categoría infantil feminina tras superar con autoridade ao Básquet Coruña por 50-32 na final celebrada no Pío XII. O partido comezou con moita tensión e nervios en ámbolos bandos, como reflicte o 9-9 do primeiro cuarto, marcado polas imprecisións e o desacerto xeneralizado.

Co paso dos minutos, as lucenses fóronse asentando e mostraron unha gran versión, especialmente no segundo período, no que lograron escapar da presión alta das coruñesas con contraataques ben executados e ataques intelixentes. Ese parcial de 17-8 antes do descanso resultou decisivo para abrir unha fenda no marcador e cambiar a dinámica do encontro.

Na segunda metade, o Ensino mantivo o control e soubo administrar a vantaxe con orde e consistencia. A defensa lucense deixou sen ideas a un Básquet Coruña que nunca se sentiu cómodo en pista, mentres as locais continuaron sumando con regularidade ata certificar un triunfo rotundo.

Con este resultado, o Ensino despide a tempada co mellor sabor de boca posible, rubricando unha excelente campaña cun título merecido e deixando grandes sensacións para o futuro.

ENSINO 50 - 32 BÁSQUET CORUÑA

Consulta a competición aquí