viernes. 27.05.2022 |
El tiempo
viernes. 27.05.2022
El tiempo

Un sector lácteo á intemperie

ALGÚNS XA dixemos que o acordo lácteo asinado en setembro en Madrid non era quen de amañar a desfeita no sector lácteo galego. Case tres meses despois segue a existir unha diferenza media de até 10 cts/litro entre o leite vendido en Galicia (26-28 cts/litro) e o prezo de venda medio no Estado. Calcúlase en 32-34 cts/litro o prezo mínimo para cobrir gastos.

Velaí, pois, como moitos dos axentes sociais do sector veñen de reproducir as súas mobilizacións, con algunha excepción que preferiu non secundalas, como a Organización de Produtores do Leite, que sobranceou nas mobilizacións de agosto e setembro. Porén, o seu coordinador estatal, Anxo Escariz, afirma sen dúbidas que “este é un problema de país, tendo en conta a importancia social, económica e ambiental deste sector, que vertebra grande parte do noso medio rural. Deixar fundir o sector lácteo galego tería non só un grande impacto económico e social, senón tamén ambiental e demográfico, desertizando de vez amplas comarcas de Galicia”.

Nesta nova xeira, nas superficies comerciais, aproveitando a gran simpatía que as consumidoras galegas amosaron a repecto das reivindicacións do sector, o prezo de venda ao público medrou até 4 cts./litro, mais só en beneficio da industria láctea e do propio distribuidor. O produtor, causante teórico dunha suba aceptada polo consumidor responsábel, fica en último de contas á marxe dos seus gaños.

No ámbito da Administración galega, compre denunciar a absoluta tolerancia na actuación de primeiros compradores sen estrutura empresarial e produtiva, que se limitan a especular co leite en prexuizo do prezo recebido polo gandeiro (que ás veces baixa até 18 cts./litro). Esta actuación é claramente disturbatoria da libre concorrencia e como tal había ser reprimida. Mais aínda non lle escoitamos ren nin á conselleira nin ao presidente Feijóo a respecto desta cuestión.

Galicia é o único país entre os dez primeiros territorios lácteos da Europa que nos últimos cinco anos non coñeceu ningún proxecto investidor superior aos 20 M€, como nos deu a coñecer recentemente o profesor da UDC Edelmiro López Iglesias. Expertos, produtores, cooperativas e axentes empresariais sinalan unánimemente ao desleixo da Xunta como principal responsábel.

Un sector lácteo á intemperie
Comentarios