DOUS expresidentes do PSOE e da Junta de Andalucía sentados. Xunto a eles, outros vinte altos cargos. Podería parecer como un consello de Goberno, pero non, é a estampa reflectida nun banco dos acusados, que o son por prevaricación, asociación ilícita ou malversación. Detrás destas figuras xurídicas agóchase a adulteración do uso do diñeiro público para destinalo a persoas que ao final revertía en financiamento do partido; isto é, corrupción. É o que se xulga na Audiencia de Sevilla, e por extensión o xeito en que se gobernou durante décadas esta comunidade autónoma. Durante todo o proceso foron condenados publicamente os persoeiros agora axuizados, xa todos mortos politicamente pola causa; pero se son culpados en sentenza pasará de presunta a constatada a existencia dun réxime clientelar, un descrédito na xestión dunha autonomía pero prolongable a toda a política.
