MOITO PATRIOTA amarelovermello de pulseiriña ou de cinta no coche pero con residencia fiscal en Suíza, Panamá ou algún outro paraíso, se non oficial ás agachadas, que aínda é peor. Eles que poden, e saben. Non é exclusiva española a fraude. De feito nos papeis panameños figuran potentados de case todo o mundo, incluídos de países que por aquí temos como máis honestos có noso en cuestións tributarias. Dinamarca, poño por caso. Pois este Estado decidiu comprar a información sobre os estafadores, porque considera que lle resulta rendible. Estudado o asunto, conclúe que a recuperación do defraudado para as contas públicas resultará maior có pagado polos datos. Tamén isto demostra que a inversión en persecución fiscal compensa, e que as administracións poderían facer máis esforzo para evitar as trampas. Iso sería un bo exemplo de patriotismo, pois representaría a mellor defensa do país.
Buscar
Comentarios