PREFERIU inmolarse Rajoy ante unha moción de censura que cando se foi pasar a tarde no bar xa sabía maioritaria que convocar eleccións como pretendía Ciudadanos a risco de perdelas. Así pode pasar á historia como quen quedou primeiro en todos os comicios desde que chegou a presidente, aínda que obvia as dúas anteriores convocatorias xerais que perdeu diante de Zapatero, que ese si que gañou sempre. E vaise, obrigado do Goberno e por vontade propia do liderado do partido, sen sinais de autocrítica, como se a demostrada corrupción do PP que preside desde hai 14 anos non fose con el. Reproches a todos os demais, como se incluso os deputados do PNV que apoiaron os orzamentos fosen distintos aos que votaron a moción de censura, pero ningunha autorrecriminación. Algo de crítica propia non lle viría mal na despedida, porque se fose tan idílico como o pinta seguiría de presidente.
