O PP pretende acabar coas portas xiratorias entre política e xustiza, non quere que haxa no CGPJ ningunha persoa que tivera actividades políticas, di Enrique López para argumentar o veto aos propostos por Podemos para o Poder Xudicial; así, sen rubor, el, que agora é conselleiro de Xustiza en Madrid logo de estar no Tribunal Constitucional e anteriormente no CGPJ, desde onde fixo oposición ao Goberno, igual que desta volta Carlos Lesmes, que fora director xeral no Goberno de Aznar. O PP prefire que se manteña tal como está o órgano reitor dos xuíces de maioría conservadora por ser designado na época de Rajoy, aínda que vaia xa para dous anos e medio o tempo que debía levar renovado en virtude da representación nas Cortes. Enrique López, que no seu posto na Audiencia Nacional pretendía xulgar o caso Gürtel a pesar da súa vinculación ao PP, ata que foi recusado, autoproclámase coherente para despolitizar o goberno xudicial. Agora.
