OU SEXA que a redución de impostos era isto, eliminar (Andalucía) ou rebaixar á metade (Galicia) a imposición sobre patrimonio, que lle afecta só aos posuidores de máis dun millón de euros e que xa tiña anulado Madrid. Murcia e Cataluña poden ir a continuación neste populismo fiscal que enfronta comunidades para atraer fortunas e só beneficia a 240.000 contribuíntes en España, que se atopa entre os vinte países con máis millonarios. Residencia fiscal moitas veces ficticia para ganancia das autonomías que afrouxan nesta achega ás arcas públicas como Madrid, que elevou ao 65% a concentración dos grandes propietarios desde que suprimiu este imposto. O novo tributo centralizado que argalla o Goberno afectará só ao 1% da poboación e aportaría uns 2.300 millóns, o dobre do actual con patrimonio, e de paso evitaría competicións entre comunidades por atraerse a residencia das superfacendas para avanzar na redistribución da riqueza.
