NON ACABA nunca o debate de onde remata a liberdade de expresión para converterse en inxuria, un delito que segundo os casos pode chegar ata un castigo de dous anos de cárcere se, por exemplo, se considera grave contra algún dos membros da Familia Real. E aquí, como en toda lei, empezan as interpretacións.
Se alguén queima fotos do xefe do Estado, un xuíz pode entendelo como metafórico, que o autor se expresa contra a monarquía como forma de Estado e que non atenta contra ninguén porque unicamente se trata dun xesto político, algo que non debería ser ilícito. Porén, outro maxistrado pode asegurar que a destrución da imaxe do Rei dana o prestixio da Coroa, e iso estaría penalmente castigado.
Se se opta por esta interpretación pódese concluír que a liberdade de expresión está rabenada quizais porque se moldea para satisfacer as necesidades dos que ostentan o poder e fixan os límites.
