A XENOFOBIA medra en Europa, que é o mesmo que dicir que aumentan os defensores das desigualdades. Asentado nun ultranacionalismo de privilexio dos nativos dun territorio agacha o temor a ter que compartir co pobre, chegado a oleadas de países en guerra ou dominados pola miseria, ou ben de estados do lado aos que a crise empurra cara o exterior. O Brexit triunfou en Gran Bretaña concretado na defensa da desigualdade, na crenza de que os cidadáns das illas estaban aportando para que os doutros países viviran do conto, e que os chegados de fóra só era para restar aos nativos. Xa o explica con contundencia o economista Thomas Piketty, o nacionalismo de Estado e a xenofobia configuran a resposta doada diante das desigualdades, como a medranza do convencemento de que as políticas sociais premian unicamente a vaguería. E cara aí parece camiñar Europa.
