Chégase ás eleccións catalás tras unha campaña na que primaron as descualificacións, nada inusual, nesta comunidade e na maioría das convocatorias no resto dos territorios; pero desta volta pareceu aínda máis abrupta. Será pola pandemia, que fai a todos máis ariscos. E iso para que se deslice minimamente a liña entre bloques, porque en Cataluña a política desde hai tempo móvese por bandos; se ben desde hoxe entre os constitucionalistas o PSC substituirá a Cs e entre os independentistas depende da abstención, que favorece a JxCat se é elevada. A situación a pesar da crise sanitaria non dista moito da de 2017. Non obstante, cando semellaban abrirse alternativas, nas que ERC sería determinante para inclinar o Govern cara a esquerda, con PSC e ECP, ou que se manteña o actual, pecháronse de súpeto co veto de pactar con Illa. Iso só deixa unha vía, a independentista, e se esa non chega a 68, non se poderían desbotar novas eleccións. E máis lea.
