HAI ANOS para salvar a Botín inventouse un enredo xudicial convertido logo en doutrina, á que agora se recorre co fin de evitar un escarnio maior para a irmá pequena do Rei. Xa lle chega ben sentarse no banco dos acusados como para ter que ser sentenciada ou incluso ir ao cárcere, algo que a bo seguro lle agarda ao cuñado do xefe do Estado, o seu marido. A petición é de case vinte anos. Gañará a Infanta, pero a Xustiza pode caer derrotada, e xunto con ela os en aparencia defensores de que a Lei é igual para todos. A Fiscalía, por definición acusadora, é quen senta os argumentos para que o avogado de Dona Cristina consiga que se retiren os cargos contra ela, ao haber só incriminación particular. É posible que sexa inocente, que non se decatara do tipo de documentos que asinara ao confiar no seu marido, pero ao converterse o fiscal en defensor deixa a posición da Xustiza en entredito.
