NON SEI por que me sorprendo, porque debería estar escarmentado de ver tantos comportamentos salvaxes nesta vida, pero pasa o tempo e aínda me impresiona que se concentren miles de chamadas persoas para exteriorizar comportamentos peores cós dos animais ao gozar co aguilloamento dun touro. Lexislouse para que nos matadoiros as reses morran co menor sufrimento, establecéronse normas para que nas granxas as pitas teñan máis espazo e evitar así o seu estrés, aprobáronse leis para que os animais non participen en espectáculos circenses e prohibíronse outros, pero a pesar da declaración universal das Nacións Unidas de hai case catro décadas na que se indica que ningún animal será sometido a malos tratos nin actos de crueldade aquí sigue habendo escenas propias da Idade Media en Tordesillas ou en prazas pechadas. O resto das especies non pode padecer, os touros si.
