CAMPAÑAS de odio para provocar, dá igual que sexa inverno ou verán, a misión é enfrontar, acosar para uniformizar na busca da ocultación ou a eliminación do distinto. Avivar o odio. Aos gays, aos inmigrantes, a idiomas. Publicidade contra os expatriados acusados de todo tipo de delincuencia, estigmatización dun colectivo, como se todos fosen iguais, e mira que hai infractores nativos, abundantes entre patrioteiros de bandeiriña. Autobuses en circulación como arietes contra as persoas trans. Valados de odio ás linguas que non son a castelá, como se o resto das oficiais do país non fosen igual de españolas. Arremetidas contra o colectivo LGTBI porque no país só se admiten machirulos, con retirada de estandartes incluída, alegoría da supresión duns dereitos tan custosos de conseguir. A ultradereita, coas entidades afíns, desde antiabortistas, sindicais ou idiomáticas, fomenta odio ao arremeter contra todas as arestas da uniformidade.
