O ruído que podía producir no Congreso a comisión de investigación sobre supostas actividades ilícitas de Juan Carlos I quedou amortecido polo rexeitamento dos tres partidos con maior representación, PSOE, PP e Vox. Igual que quedou atemperada a decisión da Fiscalía do Supremo de indagar sobre as presuntas comisións polas obras do Ave Á Meca recibidas polo Rei emérito. Nese caso debeuse á pandemia polo coronavirus, que agachaba calquera outra contrariedade. Pero o problema no que o pai de Felipe VI embarcou a monarquía persiste, por moito que as circunstancias o atenúen e o actual xefe do Estado se apresurara en anunciar a renuncia a unha parte da herdanza, a material, que se sospeita parcialmente amasada con actividades fraudulentas, que non a relativa á coroa. Con esa decisión pretende blindarse ante posibles corrupcións do pai, pero a máis alta institución sufre continuos desgustos por máis que se oculten no balbordo.
