Como non podo pasear polas noites busco conspiracións na rede social Twitch. Un cazafantasmas de Roma descubriume que no Vaticano hai un telescopio bautizado como Lucifer. Para quen non o coñeza, o Vaticano é coma Rábade, pero con máis curas por parroquia.
O Iker Jiménez de Twitch revelaba que ese telescopio foi chamado polo Papa Francisco. O pontífice fíase dos xesuítas. Un científico desa fracción eclesial, Guy Consolmagno, escribiu o libro Bautizaría vostede a un extraterrestre?. Se van chegar ao extremo de evanxelizar o satélite Gamínedes como non van dar un nome de Becelbú a un telescopio?
Hai quen bota a culpa aos xesuítas, coma se fixo historicamente. O Papa Gregorio XIII encargoulles reformar o calendario en 1578 e para iso lles erixiu a Torre dos Ventos. O telescopio Lucifer existe e está xunto a outros tres do Vaticano en Arizona, pero ese non pertence á Igrexa católica.
Os observatorios que sinalan as estrelas ás veces parecen responsables de que se apaguen. Acontece cos xornalistas, que son acusados como demos menores. A causa máis frecuente de fracasos entre políticos lucenses é Pilar de Lara. En segundo lugar van as derrotas electorais.En terceiro, a familia.
O exconselleiro do Bloque Fernando Blanco acaba de lograr que o Consejo General del Poder Judicial lle recoñeza o dereito a ser indemnizado como vítima da ambición procesal de De Lara cando era unha xuíza estrela. Pouco tardan as estrelas fugaces en caer coma lágrimas de San Lourenzo.
O escritor André Gide logrou a máxima desmesura da irreverencia con Os sotos de Vaticano. Escribiu nesa novela o xeito de coñecer a mentalidade dunha cidade na que nunca se estivera: "O primero que fago é visitar os cemiterios, os mercados e os tribunais de xustiza".