ONTE SOÑEI que entrevistaba a Feijóo e me daba un dos mellores titulares da miña carreira: "Después de comer siempre me echo dos pitis". Mentres el seguía falando, a miña cabeza xa maquinaba na portada do xornal do día seguinte con aquela confesión que, a todas luces, sacudiría a política galega. Feijóo, espléndido coma nos seus mellores Consellos da Xunta, aínda me regalaría outro: "Desde pequeñito soy del Barça, a muerte". Era unha bomba. Que presidente galego soña con Messi antes que con Aspas? Cando xa me visualizaba recollendo un Pulitzer incontestable, caín na conta de que a maldita gravadora estaba apagada. E o Pulitzer, que xa alzaba entre as mans, convertíase en cuestión de segundos no balance diario do Sergas sobre o coronavirus.
