CALQUERA PERSOA persoa que goce no seu tempo libre da contemplación de obras públicas escusa dar un paseo por Sarria. A única opción que lle queda para non sucumbir ao aburrimento é apostarse na Praza da Vila para observar como os alumnos-traballadores do obradoiro de emprego acondicionan o pavimento.
E non será porque non haxa onde investir. Abonda con ver o estado dos pasos de peóns, dos parques ou das beirrarúas. Sen ir máis lonxe, o céntrico bulevar de Calvo Sotelo clama por un arranxo da calzada. Hai só uns días unha muller que se dispoñía a subir a un coche tivo a mala sorte de meter o pé nunha fochanca, coa profundidade suficiente como para retorcelo e caer na rúa. Agora anúnciasenos no último pleno que está prevista unha actuación "completa" na zona, para a cal se están "barallando" dúas opcións e que se acometerá "cando o tempo sexa adecuado", agardando que resulte máis acertada que os pegotes do ano 2016.
Os datos sobre a ausencia de obra pública en Sarria son elocuentes. Segundo as cifras que manexa a delegación da Asociación Provincial de Empresarios da Construción, baseadas nun informe da federación galega do sector, entre xaneiro e setembro do pasado ano o Concello sarriao licitou só 66.902 euros, unha redución drástica con respecto aos 154.831 do mesmo período do 2016.
E o asunto non parece que vaia mellorar en gran medida. Cuns orzamentos que están prorrogados dende o ano 2015, o goberno segue sen presentar unha proposta propia que permita coñecer a súa folla de ruta. Así as cousas, o único investimento de certa relevancia que se albisca é a primeira fase de ampliación do cemiterio, obra necesaria por canto hai veciños que levan anos agardando por un panteón, e para a cal existe proxecto aprobado e partida orzamentaria.
Polo demais, cando a Deputación Provincial de Lugo acaba de presentar un novo plan único para os concellos, no caso de Sarria aínda están sen investir a maior parte dos 500.000 euros que lle corresponderon dentro deste mesmo programa no 2017. Case a metade destes fondos están comprometidos para a mellora da Rúa Diego Pazos, entre os cruces da Avenida e A Ciguñeira, unha actuación cun retraso de seis meses que o goberno atribúe á falta dun permiso autonómico. Pero tampouco saíron a contratación outras melloras previstas no mesmo plan provincial do pasado ano, coma o subministro de material por importe de 57.000 euros para a residencia de maiores Nosa Señora do Carme.
Do mesmo xeito, mentres outros concellos da comarca coma O Incio ou Triacastela –vinculados ao Grupo de Desenvolvemento Rural Ribeira Sacra-O Courel– xa acometeron obras sufragadas con fondos Leader, no caso de Sarria nada se coñece de actuacións con cargo a estes plans.
E iso por non citar a existencia dunha piscina que vai para cinco anos rematada e sen entrar en servizo, dunha ponte que supera os tres anos cortada e dun desdobramento do corredor para o que só se presupostan de novo este ano 250.000 euros.