Quere deixar ben clara unha cousa: todas as decisións que se tomaron nos dez días que durou a mobilización en Lugo foron respaldadas pola maioría dos representantes municipais dos gandeiros e nunca obedeceron a ningunha decisión persoal. Roberto López Rivas, o gandeiro de San Vicente de Coeo que se convertiu en líder dos produtores, pensa seguir adiante, loitando por unha plataforma de afectados polos baixos prezos do leite pero cunha premisa, a mesma que deu pé a desconvocar a tractorada: non participar en actos vandálicos.
Van xa tres días de boicot ás industrias por parte dalgúns gandeiros que quixeron seguir coa protesta. Que pensa vostede disto?
Este non é o camiño. As perdas son moi grandes. Por moito que lles vendan a moto, xa veremos o que se recupera despois.
Non podería ser esta a única vía para conseguir a suba dos prezos?
Non, hai outras vías. Os días que estivemos na Ronda conseguimos cousas tan grandes como poñer nerviosa a xente que agora cambiou de actitude.
Refírese aos gandeiros que non se foron con vostede?
Non, aos gandeiros que seguen formando parte da plataforma e tamén aos sindicatos. O estrano é que, nesas mobilizacións, frente as industrias, non está a haber só gandeiros. Máis ben, gandeiros hai poucos. Hai xente que non ten nada que ver co sector e está alí.
Pero logo quen son?
Son amigos dalguén.
Pensou algunha vez en convertirse no líder que foi?
Non. Subinme o primeiro día ao tractor sen pensar que a mobilización chegaría a ser o que foi e que eu pasaría a ser o voceiro. Subín porque estaba cabreado e só quería dicir o que pensaba. De alí formouse un grupo de reunión e empezaron a atacarnos a nós. Acusándonos de cousas e deixándonos en mal lugar. Estes días recibín moitos apoios, mesmo de xente que non me coñece. E críticas tamén recibín. Pero que quede clara unha cousa: eu sempre estiven ao lado dos gandeiros e sempre me desmarquei de calquer tipo de cor política. E se non, o tempo dirao.
Foron os sindicatos os que desfixeron a mobilización de Lugo?
Non cabe dúbida de que aquí houbo intereses políticos e sindicais, que é todo o mesmo, por detrás. Iso está claro.
"As perdas son moi grandes. Por moito que lles vendan a moto, xa veremos o que se recupera despois"
Dise que recibiu ameazas...
Non, ameazas non recibín. Ao contrario, houbo ofertas de achegamentos a certos partidos.
Viron en vostede un líder nato?
Non o sei, pero si que me solicitaron para reunións para achegar posturas comigo.
Cre que a desconvocatoria da tractorada pode ser vista como unha covardía por parte dalgúns gandeiros que, en principio, confiaban en vostede?
Nós non quixemos cargar con eses actos vandálicos. O sábado tiñamos solicitado, na Subdelegación de Goberno, concentracións diante das industrias e distribuidoras. Se había disturbios, os responsables eramos os organizadores desas concentracións, aínda que fosen outros, e non queriamos que iso sucedese. Non desconvocamos só porque romperan o carro de Lence. Foi tamén por outras cousas peores como cortar as mangueiras das cisternas ou parar os camións e tirarlles o leite.
E iso non lle deu unha mala imaxe, recuar neste momento?
Non foi Roberto quen tomou esa decisión, aínda que recoñezo que eu tiña medo. A decisión foi da maioría da asemblea formada por representantes de 45 concellos. Roberto só puxo a voz. Eu o único que fixen foi subirme a un tractor e dicir o que pensaba. Tamén dixen varias veces que prefería que falasen outras persoas e non eu. O concello de Lugo ten outros dous representantes pero non subiron a falar. É máis, eu, na asemblea, non tiña nin voto.
"Solicitáronme en reunións para achegar posturas pero non teño ningunha cor política"
Cantos gandeiros se desmarcaron da maioría da asemblea?
Poucos. O venres, cando decidimos ir ás grandes superficies, había 1.000 tractores na Ronda e só 40 decidiron marchar.
Despois de todo, non quedou algo frustrado tras romperse, deste xeito, a mobilización que encabezou durante dez días?
Non se rompeu nada. Foi algo moi bonito que non vai morrer. Pensamos seguirnos reunindo e constituírnos en algo.
Volverán ás andadas en outubro se non melloran as cousas?
Efectivamente. Mañá [por este martes] faremos unha nova asemblea os representantes dos concellos. Agora o importante é agruparse e vixiar que ese documento que prometeu o Goberno se leve a cabo. Se non, volveremos, sen ningún problema. Veremos se somos capaces de concentrar nós sós a xente. Coa mobilización de Lugo, unimos a moitos gandeiros de todas a cores políticas e iso xa foi moito, moitísimo.
As perdas son moi grandes. Por moito que lles vendan a moto, xa veremos o que se recupera despois
Política