ALGÚNS XA O fan, entón por que non se pode xeralizar a medida? Rompe costumes arraigadas, pero o camiño para favorecer a conciliación familiar e laboral vai cara a que a xornada remate antes. Ás seis da tarde, di a ministra de Emprego, e como idea de partida está ben, pero a decisión, por estar dirixida á empresa privada, dependerá da vontade de patronal e sindicatos como representantes das dúas partes afectadas. Desde a Administración si se pode ir favorecendo esta tendencia con algunhas decisións, empezando polo adianto dos informativos e os principais programas nocturnos nas televisións públicas. E se de racionalización de horarios se fala, a adaptación do fuso é imprescindible. Quen defenda o cambio non pon en risco a unidade estatal, como algúns alertan con temor infundado, senón que unicamente se achega á lóxica do sol e da latitude. Queda camiño, pero haberá que andalo.
