SE MADRID fose España, como di a triunfadora case absoluta do martes, pola Moncloa non tiveran pasado Zapatero nin Sánchez, pois o PP goberna na comunidade desde hai 26 anos. Por iso non se pode extrapolar a vitoria rotunda de Ayuso e a estrepitosa caída do PSOE ao resto do país, onde en Cataluña os populares veñen de quedar na insignificancia e os socialistas gañar as eleccións, á inversa do que pouco tempo atrás ocorrera en Galicia. Evidentemente si representa un considerable pulo para un partido deprimido, agora insuflado de euforia para posteriores convocatorias, suponse que aínda lonxanas. E se o PP sae da depresión, entra no abismo Ciudadanos por un transvase de voto entre formacións que pode levar aos laranxas a terminar como UPyD anos atrás. Algúns dirixentes e destacados militantes xa foran atopando acomodo, pero sen producir a desbandada que se aventura, porque o seu tempo parece máis pasado que futuro.
