NO PARTIDO entre competidores políticos disputado este pasado domingo gañaron as esquerdas. Non hai moito, noutra xornada, as vencedoras foron as dereitas. Antonte foi un encontro de clasificación de cara a unha fase final (eleccións en Andalucía e no horizonte as xerais), mentres que o do primeiro martes de maio estaba en xogo un título (Madrid), erguido polo PP sobre as cinzas de Ciudadanos e o apoio de Vox. Este domingo foi ben distinto, sen foto conxunta en Colón nunha concentración minguante de liderado difuso as dereitas perderon protagonismo; mentres, o candidato de Sánchez impoñíase con claridade a Díaz para alivio de Ferraz e da Moncloa, e a sucesora de Iglesias aproximábase ao 90% da militancia inscrita de Podemos para manter unha bicefalia a modo da que sempre tivo o PNV, a de separar o líder do partido do candidato á presidencia. Os títulos son os que contan, pero para chegar a eles hai que ir superando as competicións previas.
Procura
Comentarios