Opinión

Delirio co FMI

HAI ALGUNHAS medidas de política económica francamente rechamantes, por non dicer totalmente envelenadas. Vexamos: en plena contenda electoral volve ladrar o Fondo Monetario Internacional (FMI) a fin de lle lembrar aos votantes do Estado Español que aínda poden poñerse moito máis duros coas recomendacións de ortodoxia liberal -ultra- para a política económica española, e como consecuencia apiorar notabelmente as condicións de vida dos cidadáns. Ousaron dicer que aínda facía falla subir o IVA (en realidade a súa linguaxe é mais escura e un pouquiño máis cínica), tamén cumpría abaratar os despedimentos, mesmo facer un novo contrato para eliminar paulatinamente as diferenzas de dereitos entre os indefinidos e os temporais, e reducir os desfasamentos fiscais nas autonomías introducindo o copagamento nos servizos sanitarios e na educación. Así mesmo, saúdan con ledicia a recente diminución dos impostos sobre beneficios das empresas societarias, xa que xulgan que esa recollida privada dos beneficios xerados na actividade produtiva vai supoñer un incentivo ao investimento novo.

A min paréceme ben case todo. Mesmo, póndome na senda do ultraliberalismo de libro (libro do propio Fondo, que de rancio e autocalcante xa cheira), estamos en condicións de aportar ideias novas. Eu proporía suprimir o salario mínimo e crear a figura de contrato de traballo sen salario: pola comida e habitación. Deste xeito, eliminaríase unha grande cantidade de custos e sabendo que o modelo histórico (xa se sabe cal é) bastaría copialo dos poboados mineiros do século XIX. Iso si, non podería haber copagamento porque non reciben diñeiro mais a vantaxe é que tampouco precisan ensino porque non hai nenos. A saúde estaría garantida polo médico da empresa, e as dotacións de equipa sanitaria precisas, pagas pola da empresa. Ao ter que traballar moitísimas horas, o suposto tempo de ocio é so descanso físico.

A saúde estaría garantida polo médico da empresa, e as dotacións de equipa sanitaria precisas, pagas pola da empresa

Esta ideia é practicábel só nas empresas industriais. Hei de pensar mellor o mesmo modelo para o conxunto grande das hoxe pertencentes ao sector servizos. Algunhas que son filiais de grandes compañías multinacionais poderían funcionar en polígonos de servizos de forma parecida ás industriais e, co mesmo modelo laboral, traballar pola comida e a vivenda. Imaxinemos: debo ir ao banco (eu era das traballadoras antigas, con salario) e diríxome ao polígono de servizos: alí estarían todos os intermediarios financeiros, e, xa que son todos iguais, iría ao mais rápido. A senda da competitividade e mais da competencia esmagadora das grandes compañías tería resolvido o problema que se presenta agora neste delirio tipo FMI, coas empresas de servizos persoais de pequeno tamaño e que poboan en grande número a paisaxe económica.

Se se di que a racionalidade económica non permite a prestación de servizos complexos de forma fraccionada e que debe primar a concentración para os converter en eficientes, apliquemos a máxima e suprimamos na Galiza todos os concellos menos 7 (os das cidades), suprimamos todos os centros privados de ensino e sanidade que non viven máis que das subvencións e finalmente suprimamos os galegos xubilados que non fan mais que gastar: non son rendíbeis.

Comentarios