POR CUESTIÓNS que non veñen ao caso —e que non revelarei para manter a Miriam no máis estrito anonimato— estou achegándome á cociña vegana. É todo un reto, como comprenderán, para quen venera o churrasco por enriba de todas as cousas.
Antes de que a soia entrase en contacto por primeira vez cos meus zumes gástricos, polo meu pensamento sobrevoaba a frase de Sinuhé, o exipcio: "Quen probou a auga do Nilo, ningunha outra auga saciará a súa sede".
Preguntábame se serían os substitutivos da carne á carne o que Bunbury é a Jim Morrison. Con todas esas dúbidas me enfrontei ao non–polo de heura. E confesarei: estaba bo. Prexuízo desbloqueado.
