DEIXO EN mans de Alberto Vilas, cronista oficial da noite compostelá, a necrolóxica de Ruta, a discoteca na que, en palabras de Mari Carmen Rama, tantas veces "lambemos o rodapé", e céntrome no realmente importante: as filloas. Este sábado repartíanas de balde en Santo Domingo os edís do BNG. Quedan tres meses para as municipais e os políticos están máis bos e xenerosos ca nunca. Por iso, querido cidadán, non se estrañe se de aquí a maio se atopa a Candia regalando repostaría do Rei das Tartas na Praza Maior ou a Lara Méndez despachando botelos da Fonsagrada en Campo Castelo. Un consello: pape o que poida, pero non vote co padal.
