ONTE FOI foi Blue Monday, o día máis triste do ano segundo inventou, probablemente, algunha farmacéutica para vender máis antidepresivos. Pero hai algo aínda moito máis triste: os puntos limpos.
Cemiterio infinito de pantallas, podridoiro de cadeiras e mesas, última parada de maletas escascadas na súa viaxe cara a ningures, descanso eterno de colchóns deformados polo paso do tempo e polo peso dos corpos engordados no McDonald's. Ás veces mesmo se teñen visto neles reloxos Casio e pezas dun Twingo.
Os puntos limpos son a viva imaxe do consumismo. Debería ser obrigatoria unha visita escolar a eles a unha idade temperá. Nada como coñecer o horror desde ben pronto para poder combatilo.
