As mulleres do Incio sumáronse tamén ás reivindicacións do día 8 de marzo coa celebración dunha concentración a prol da igualdade na praza do Concello.
Unhas 70 persoas responderon á convocatoria espontánea dun grupo de mulleres do Incio que quixeron apoiar, dende a montaña e dende o rural, a folga feminista.
A poeta Olga Novo deu lectura a un manifesto da súa autoría no local multiusos do Concello, onde tamén houbo cánticos reivindicativos, música de gaitas e empanadas.
"Na primeira folga feminista na historia do noso país, dende o noso pequeno recuncho do Incio quixemos formar parte deste movemento que busca a igualdade", dixeron.