A Xunta de Galicia destinou 120.000 euros ao ensanche e mellora dos accesos ao polígono empresarial de Monterroso. As obras, que na actualidade están a executarse, realízanse desde a estrada N-640 e desde o núcleo de Seteiglesias.
A actuación, explican desde a Xunta, suporá unha mellora notable nas condicións de acceso, en especial para o tráfico pesado. A entrada desde a N-640 terá cando finalicen as obras 13,5 metros de anchura, e a nova confluencia coa vía cara a Seteiglesias desprazarase uns 12 metros con respecto á actual localización.
Para iso será preciso demoler as aletas de formigón do actual paso inferior que conecta con Seteiglesias para reconstruílas de modo que se poida ampliar o acceso, o que levará a escavación na roca dos terreos anexos e a reposición dos servizos de abastecemento, media tensión, gas ou telecomunicacións afectados.
O delegado territorial da Xunta en Lugo, José Manuel Balseiro, visitou este martes o polígono xunto ao alcalde, Miguel Rico, para coñecer o estado das obras. Balseiro recalcou que a mellora das infraestruturas fai "máis competitivas as nosas empresas, que poden deste xeito beneficiarse da mellora dos servizos comúns das áreas industriais".
"A Xunta mantén un compromiso cos gobernos locais e o desenvolvemento das súas infraestruturas", engadiu José Manuel Balseiro.
