A Xunta de Galicia comezou onte a obra para a executar a remodelación do albergue público de peregrinos de Palas de Rei. Os traballos teñen como principal obxectivo mellorar a eficiencia enerxética destas instalacións.
A actuación, promovida pola Axencia de Turismo de Galicia –organismo dependente da Vicepresidencia Primeira e Consellería de Presidencia, Xustiza e Turismo da Xunta de Galicia– conta cun orzamento total de 410.842 euros.
Os traballos están encamiñados a lograr unha maior sustentabilidade do edificio desde o punto de vista enerxético e ambiental, á vez que tratarán de buscar un maior confort dos peregrinos que se aloxen no mesmo. Neste sentido, cabe sinalar que se trata dunha instalación moi demandada polos centos de persoas que chegan ao centro urbano da localidade, seguindo o Camiño Francés.
Ademais, segundo sinala o alcalde de Palas de Rei, o popular Pablo Taboada, esta actuación resulta especialmente necesaria "ao tratarse dun ano non que estamos a notar un grande incremento de peregrinos e, sobre todo, se temos en conta que o próximo ano este fluxo de xente tenderá a incrementarse aínda máis ao ser tamén, ao igual ca leste, ano Xacobeo".
Os traballos foron adxudicados á empresa Orega Construcións que a partir de agora contará cun prazo de cinco meses para finalizar a actuación, segundo explicaron desde o Concello.
