Melide vive desde o pasado domingo as festas de San Roque. Unha das actividades máis especiais, que se estende ata este xoves, é o Mercado Medieval, ao que acoden cada ano feirantes de toda España para vender os seus produtos artesanais e gastronómicos. Os melidenses puideron gozar doutras actividades como pasarrúas, cetrería, exposicións, contacontos, espectáculos de lume ou xogos infantís.
Pola noite, no marco das festas de San Roque, o grupo La Pegatina animou o cotarro cun concerto que fixo bailar a todo o mundo.
PROGRAMACIÓN. As festas esténdense ata o vindeiro luns. Este mércores clausúrase o Mercado Medieval, e celébrase o Día da Bicicleta a partir das 10.30 horas. Pola noite, desde as 23.30 horas, O Combo Dominicano fará bailar aos melidenses no Cantón de San Roque.
O xoves, entre outras actividades, destaca a verbena, ás 22.45 con París de Noia e Bomba, tamén no Cantón. As orquestras Palladium e Nevada porán ritmo á noite do venres.
O sábado 18, o invitado máis especial será David de María, que actuará ás 23.55 no Cantón.
A protagonista do domingo 19 será a orquestra Gran Parada. O luns 20 será o último día das festas, e tamén o Día do Neno. Os máis pequenos poderán gozar desde as 18.00 horas de actividades pensadas especialmente para eles. Pola noite, Panorama clausurará as celebracións desde as 23.00 horas.
