lunes. 18.01.2021 |
El tiempo
lunes. 18.01.2021
El tiempo

Un veciño de Antas de Ulla, evacuado en helicóptero tras o envorco do seu tractor

O tractor envorcado. EP
O tractor envorcado. EP
O accidentado tivo que ser reanimado por persoal do GES e do 061, e ao peche desta edición recibía atención médica na Uci do Hula

Un veciño de Antas de Ulla de 79 anos de idade foi evacuado na tarde deste xoves en estado grave nun helicóptero medicalizado tras envorcar o tractor co que estaba a rozar unha leira e quedar atrapado baixo o vehículo agrícola. O accidente tivo lugar no lugar de Velanxil, na parroquia de Peibás, ao redor das 19.00 horas.

Foi o fillo do accidentado, que se atopaba con el na leira, o que chamou á central de coordinación de urxencias do 112, ao non poder liberar ao seu pai. A rapidez da chegada do Grupo de Emerxencias Supramunicipal (GES) de Monterroso e do helicóptero medicalizado foron determinantes para salvar a vida deste veciño.

Por unha banda, os operativos do GES procederon inmediatamente á súa excarceración e, unha vez liberado, tivéronlle que practicar a reanimación cardiopulmonar, pois perdera o pulso. Esta manobra foi realizada de forma conxunta entre os efectivos deste corpo e os sanitarios do 061, e seguindo todos os protocolos de seguridade vixentes na actualidade para previr a expansión do coronavirus. á leira tamén se desprazou unha patrulla da Garda Civil de Monterroso, reforzada posteriormente por operativos da Benemérita do destacamento de Palas de Rei.

A central do 112 Galicia tamén mobilizou aos bombeiros do parque comarcal de Chantada, aos que se lles avisou de camiño que xa non era necesaria a súa intervención, polo que regresaron á súa base.

NA UCI. Tras conseguir estabilizar o pulso e respiración do septuaxenario cunha reanimación que durou varios minutos, o helicóptero medicalizado do 061 trasladou a este veciño de Antas, que aínda permanecía inconsciente, ao Hospital Universitario Lucus Augusti (Hula), onde ao peche desta edición estaba a recibir atención médica na Uci.

Un veciño de Antas de Ulla, evacuado en helicóptero tras o envorco...