O Sector de Tráfico da Garda Civil en Galicia intensificou nas últimas semanas a vixilancia nas vías de acceso ás zonas de lecer nocturno. Con este obxectivo instaláronse, na noite do sábado ao domingo, puntos de verificación de alcol, drogas e velocidade nas vías de acceso e saída de Melide, que este fin de semana debía celebrar as súas festas patronais.
Un dos aspectos que se destaca desde a Garda Civil é "a escasa circulación que existía en comparación con anos anteriores". A pesar disto, detectáronse 24 positivos por alcol e drogas, dos cales seis serán investigados por delito contra a seguridade viaria, ao superar a taxa legalmente establecida en 0,60 miligramos por litro. Ademais, un condutor está á espera dos resultados de laboratorio tras dar positivo na proba de drogas.
Todos os positivos enfróntanse a sancións que van desde 500 a 1.000 euros, á perda de entre catro e seis puntos e, no caso dos condutores que deron resultado constitutivo de delito, unha sanción económica e servizos de beneficio á comunidade. A Garda Civil tamén resalta a ausencia de accidentes de tráfico nas estradas da zona durante o operativo.
O Sector de Tráfico de Galicia impulsará a vixilancia e control de alcol e drogas nas estradas galegas, co obxectivo de evitar que "condutores que inxiran algunha destas sustancias circulen por elas". Desde a Benemérita indican que o alcol é un factor concorrente no 26% dos accidentes viarios mortais e que, a pesar da concienciación social, un de cada catro falecidos en accidente de tráfico consumiuno.
A realización de controis preventivos é a acción máis eficaz para "retirar da circulación a persoas que beberon ou consumido drogas" e, polo tanto, "pon en risco non só a súa vida senón a do resto de condutores".
