A tensión estalou na primeira sesión plenaria de Monterroso tras o cesamento por parte do rexedor dos tres tenentes de alcalde do seu partido, Independentes por Monterroso (IxM), e o nomeamento das tres novas tenencias de alcaldía en mans do PSOE e Compromiso por Galicia (CxG).
A votación para a aprobación da ordenanza municipal reguladora do servizo de saneamento e depuración de augas residuais evidenciou a fragmentación da corporación municipal, con cinco votos en contra sumados por IxM e o PP ante o tripartito en minoría liderado por Gato. Ademais, IxM presentou unha moción para paralizar o expediente á empresa concesionaria deste servizo de augas -investigada por causar verteduras ao río Ulla-, que tamén foi aprobada cos votos da oposición.
"Isto vai durar moito", dixo en voz baixa algún dos numerosos veciños que abarrotaron o salón de plenos -entre os que estaba tamén Jesús Otero, exalcalde con Inta-, ao constatar a tensión existente entre Rocío Seijas, portavoz de IxM, e o propio alcalde.
Numerosos veciños abarrotaron o salón de plenos, entre os que estaba o exalcalde do municipio con Inta, Jesús Otero
Esta tensión non soamente se manifestou nas acusacións cruzadas ao longo dunha sesión plenaria na que a edil díscola interrompeu constantemente as quendas de palabras, senón nas decenas de preguntas que o grupo independente rexistrou para ser respondidas o pleno.
INGRESO HOSPITALARIO. A que sen dúbida máis feriu o rexedor foi a referida ao seu ingreso hospitalario, sobre a que a formación preguntaba cales e cantos foron os días nos que se tivo que ausentar do municipio por estar ingresado. "Non sei que debo responder a esta cuestión", indicou.
O número de preguntas foi tan grande con respecto a outros plenos que Gato acabou advertindo acerca do "mecanismo que se pon en marcha para responder a cada unha das preguntas, en detrimento doutras funcións non Concello", indicou.
Pola súa banda, o candidato popular, Eloy Pérez Sindín, soamente falou para recordar que no pleno anterior tanto CxG como o PSOE se abstiveron na votación das verteduras.
