Tres proxectos innovadores vinculados ao rural galego daranse a coñecer este venres nos Parladoiros, unha actividade enmarcada no festival Son d'Aldea (Palas de Rei). O Mercado da Colleita, unha iniciativa de compromiso social da Corporación Fillos de Rivera, organiza un ano máis este acto durante a primeira xornada do evento. O obxectivo que perseguen con esta proposta é recoñecer aquelas ideas que achegan un valor engadido e diferencial no medio rural.
O Mercado da Colleita vén apoiando desde 2014 este evento, que conta coa distinción de Boa Práctica Cultural por parte da Asociación Galega de Profesionais de Xestión Cultural. Este será o segundo ano consecutivo no que se celebren os Parladoiros. Nesta ocasión, as iniciativas que participarán son Kalekoi, que contará a historia dos seus iogures; Milhulloa, un proxecto de dinamismo no rural da comarca da Ulloa; e Carabuñas, que a través dos seus produtos leva a cabo un plan de revalorización do saúco.
Segundo explican os propios organizadores, cada unha destas iniciativas porá en valor o seu esforzo e a súa capacidade innovadora, ademais de relatar as súas experiencias á hora de afrontar o rural como modo de vida.
Tras o éxito da última edición, os proxectos que se darán a coñecer este ano son Carabuñas, Kalekoi e Milhulloa
Por este motivo, coa intención de facer chegar os seus proxectos ao maior número de persoas posible, as historias destes emprendedores estarán moi pronto dispoñibles en vídeo a través da web e das redes sociais do Mercado da Colleita.
APOIO AO RURAL. Os Parladoiros celebran unha nova edición avalados pola "gran acollida" que as demais actividades do Mercado da Colleita tiveron ata o momento, segundo resalta a organización.
Este proxecto trata de impulsar o desenvolvemento competitivo de Galicia e a sustentabilidade do medio rural. Nesta liña, puxeron en marcha outras propostas nos últimos anos: pop-up stores en diferentes cidades, catas e talleres de produtos, o desenvolvemento de espazos divulgativos —como o despregado no Salón de Gourmets— ou o evento do Paseo das Pontes, no marco do festival Noroeste Estrela Galicia.
SON D'ALDEA. A VIII edición do Son d'Aldea chega este venres ao concello de Palas. Este ano a programación virará ao redor da comunicación no rural durante o século XX.
Desde o Mercado da Colleita explican o apoio ofrecido ao evento aludindo a que "dinamizan e pon en valor a cultura popular rural a través de debates, monólogos, concertos, mostras de artesanía, romarías e o tradicional roteiro teatralizado".
