A feira das feiras, a de Santos de Monterroso, converteuse sen querelo na ocasión perfecta para dar por inaugurada a campaña electoral. Os miles de persoas que cada ano se achegan ata a localidade no Día de Defuntos atoparon esta vez, ademais de xoias, roupa, calzado ou maquinaria agrícola, argumentos para decidir o seu voto o próximo 10-N. Coñecedores do tirón da xornada, PSOE, PP, Cs, BNG e Vox mobilizáronse en maior ou menor grao para visibilizar o seu programa.
"Para nós o rural é moi importante e por iso levamos medidas concretas para loitar contra o despoboamento", asegurou este venres o candidato de Cs por Lugo, José Manuel Blanco, durante a súa visita á Feira de Monterroso, onde degustou unhas racións de polbo xunto a compañeiros de partido.
Desde a súa mesa quizá puideron escoitar as mensaxes que o PSOE lanzaba pola megafonía dun coche que percorreu as inmediacións do recinto. Ata alí achegáronse tamén membros do PP como o número dous ao Congreso por Lugo, Joaquín García Díez, ou o número un ao Senado, José Manuel Barreiro, así como o delegado da Xunta, José Manuel Balseiro, entre outros.
Aos candidatos do BNG víuselles pegar carteis, mentres que a nota de cor puxérona dous mozos que, como afronta ao ideario ultradereitista, bicáronse fronte ao expositor de Vox baixo a mirada do candidato Cristian González.
