O camiño para a sucesión de Antonio Gato na alcaldía de Monterroso está aberto, e con ese horizonte o PSOE, que foi a segunda forza máis votada nas eleccións municipais —cun voto menos que a primeira—, non descarta presentar a súa propia candidatura para dirixir o goberno local. A corporación municipal tomou coñecemento da renuncia de Gato nun pleno celebrado este luns e deberá elixir o seu sucesor nunha sesión que se espera que teña lugar no prazo de dez días hábiles.
Neste punto, o portavoz municipal do PSdeG en Monterroso, Rafael García, asegura que o seu partido se sente nestes momentos "lexitimado" para estudar calquera opción que lle dea "estabilidade" ao consistorio, especialmente "logo de todo o que sucedeu no último ano", coa ruptura do alcalde saínte e o seu grupo Independentes por Monterroso, que foi a forza con máis apoios nas pasadas eleccións locais.
A corporación local quedou "moi fragmentada", recoñeceu o portavoz socialista, logo das últimas eleccións municipais, nas que o Partido Socialista conseguiu tres concelleiros.
"Sentímonos lexitimados para presentar o noso propio candidato ou apoiar o doutro partido", dixo Rafael García, quen confirmou que a formación estudará todas as opcións posibles nos próximos días. "Non descartamos nada", engadiu, pero tamén precisou que calquera decisión que tome o PSdeG será "pensando en Monterroso" e en darlle "estabilidade" ao Concello.
A corporación municipal de Monterroso está formada actualmente por catro edís do partido independente co que se presentou o exalcalde, tres do Partido Socialista, outros tres do Partido Popular e un de Compromiso por Galicia.
