Os traballos que se están executando no complexo deportivo de Monterroso, co fin de habilitar uns vestiarios e realizar outras melloras en distintas zonas do edificio que alberga a piscina climatizada, non logran concretar unha data para a apertura dunha instalación pola que esperan os monterrosinos desde hai máis de oito anos, cando se iniciaron as obras.
Estes traballos están financiados grazas a un acordo entre o anterior goberno provincial de Darío Campos e o anterior equipo municipal de Miguel Rico. En virtude do mesmo, a Deputación achegou 200.000 euros para realizar melloras na instalación eléctrica, construír novos vestiarios, renovar a entrada ao complexo, instalar despachos de billetes e facilitar a entrada de luz natural a varias zonas do edificio.
Tras as pasadas eleccións do mes de maio, o novo goberno municipal, presidido por Antonio Gato, licitou e puxo en marcha os traballos, que deberán estar totalmente finalizados a mediados do próximo mes de novembro.
Antonio Gato dubida de que a cantidade prevista polo goberno provincial sexa suficiente para emendar todas as deficiencias
O rexedor monterrosino dúbida, con todo, de que a cantidade achegada pola Deputación para acabar a obra sexa suficiente como para emendar todas as deficiencias que, segundo el, aínda presenta a instalación.
Antonio Gato explicou que os técnicos alertan agora sobre a necesidade de instalar un falso teito e tamén advertiu de que aínda queda por amoblar "o recinto" antes de que o Concello o reciba, "polo que me parece que eses 200.000 euros quedarán moi curtos para poder realizar todo o que aínda está pendente", insistiu.
Gato, que precisamente foi o impulsor da construción destas instalacións nun anterior mandato seu, mostrouse "totalmente comprometido" para que este complexo deportivo se poida abrir canto antes ao público. "Teño prometido ser o primeiro en tirarme á piscina", asegurou, á vez que reiterou que unha vez que esta obra estea completamente finalizada "seremos os primeiros en aplaudir e ademais buscaremos un acordo coa Deputación dde Lugo para facernos cargo da súa xestión".
O alcalde monterrosino tamén explicou que, se como cre, son necesarias máis investimentos para poder rematar a obra, "a Deputación sexa dillixente" para que se poida inaugurar canto antes.
