Un grupo de oito peregrinos atópase illado nun albergue privado de Palas de Rei despois de que unha das persoas coa que facían o Camiño de Santiago dese positivo en covid-19. Esta peregrina, segundo indicaron, chegou en avión desde Mallorca e este sábado permanecía ingresada no Hospital Clínico Universitario de Santiago (CHUS).
Unha das mozas confinadas, veciña de Compostela, explicou que este sábado pola noite recibiron unha chamada das autoridades sanitarias de Lugo indicándolles que este mesmo domingo desprazarase un equipo ata Palas para facerlles a proba PCR no establecemento a estas oito persoas e, a partir de aí, determinar onde farán a corentena.
O grupo inicial estaba formado por nove peregrinos, compañeiros da universidade en Madrid, dúas deles galegos e o resto procedentes de distintos puntos de España. Iniciaron o Camiño Francés en Sarria e, á chegada a Palas, o pasado venres, unha das mozas comezou a sentirse mal.
O grupo está formado por compañeiros da universidade en Madrid e comezou o Camiño Francés en Sarria
Segundo sinalaron nun comunicado, acudiron ao centro de saúde, onde lles dixeron que a peregrina debía confinarse á espera de desprazarse ao día seguinte a Lugo para facer a proba PCR. Un familiar dun dos membros da expedición viaxou entón desde Santiago para levala ao CHUS, onde deu positivo e quedou ingresada.
O resto do grupo se autoconfinó no albergue. Pola tarde, denunciaron sentirse moi preocupados por falta de información e porque o día antes durmiran noutro establecemento de Portomarín compartido e, aínda que estaban nun grupo burbulla, era un pavillón con literas. Pola noite, atopábanse un pouco "máis aliviados" e "tranquilos" tras indicarlles que este domingo lles farán as PCR.
Segundo dixeron, as oito persoas illadas atópanse ben e sen sintomatoloxía.
Os responsables do albergue, engadiron, leváronlles as comidas e estanlles axudando neste confinamento. "Son moi amables, preocupados por nós e sen pór ningún problema. Estamos moi agradecidos". A súa inquietude é pola súa compañeira e as outras persoas coas que puideron coincidir no Camiño. "Avisamos de onde estivemos e esperemos que isto se axilice e poida resolverse canto antes", conclúen.
