Palas de Rei lidera o número de matriculacións de novos turismos por habitante, tal e como indican os datos recentemente publicados do Instituto Galego de Estatística (Ige), referidos ao exercicio 2018.
Os palenses compraron nesta última anualidade da que se teñen datos un total de 158 turismos, o que implicou preto de tres novas matriculacións por semana. Estes datos separan ao concello palense dos seus veciños na comarca de A Ulloa.
Palas de Rei conta con 3.338 habitantes, segundo o último censo. En Melide, con case o dobre de poboación, o número de matriculacións foi de 99 novos turismos; en Monterroso, con 300 habitantes máis, a cantidade foi tres veces menor, cun total de 55. Antas de Ulla resultou ser o concello á cola, cun total de 31 por case 2.000 habitantes.
Cunha poboación similar, xa na comarca de Lugo, Friol rexistrou 42 turismos matriculados en 2018 ou Guitiriz, con 5.484 habitantes, 116. E é que Palas de Rei tivo incluso máis matriculacións que o concello coa maior riqueza por habitante, Cervo, que con 1.000 habitantes máis contou cun total de 112 novos turismos no 2018.
INDICADOR. O alcalde da localidade, Pablo Taboada, asume este dato como un índice do crecemento que experimentou o concello nos últimos anos.
"Quitar os municipios de Cervo, que ten Alcoa, ou Muras, co parque eólico, nós somos dous primeiros en riqueza por habitante", comenta.
Para Taboada, o motivo deste aumento de riqueza por habitante do que é significativo a venda de vehículos reside na instalación no municipio, nos últimos anos, da granxa Campomayor e da empresa Jim Sports.
"Entre as dúas empresas facturan preto de 40 millóns de euros, e teñen máis de 200 persoas contratadas", afirma. Tamén destaca a fonte de riqueza que supón o Camiño de Santiago.
A todo iso habería que engadir os preto de seis millóns en expropiacións que os veciños recibiron no ano 2017 pola construción do novo tramo da A-54 polo municipio.
