O Concello de Palas de Rei organiza esta semana varios actos para conmemorar o Día Internacional contra a Violencia de Xénero, que se celebra o 25 de novembro. Entre as actividades previstas hai unha carreira solidaria, a proxección dunha curtametraxe ou unha representación teatral.
O concello acolleu a presentación desta programación nun acto presidido polo alcalde, Pablo Taboada, que estivo acompañado pola concelleira de igualdade, Alba Villasante e membros do Centro de Información á Muller (CIM) do municipio.
Os actos arrincaron coa proxección no centro de día da localidade da curtametraxe Miña, que aborda a problemática da violencia de xénero desde o ámbito veciñal. Ao finalizar a emisión estaba previsto celebrar unha charla coloquio.
O programa continúa este venres ás 12.45 horas na casa da cultura coa representación da obra de teatro Manancial de Fantasía por parte da compañía Alentía Teatro. Trátase dun espectáculo no que se defenden valores como a igualdade ou a tolerancia.
Para rematar, o sábado terá lugar a II Andaina contra a Violencia de xénero, que partirá ás 11.00 horas desde a Praza do Concello ata chegar ao castelo de Pambre. Será unha marcha reivindicativa de oito quilómetros. Para participar é necesario inscribirse no Concello.
