O nome delata o seu uso primigenio. Galpón Boutique, con este último apelativo engadido para darlle un toque de distinción, é un alpendre reconvertido nun singular apartamento turístico, con xardín, hórreo e unha pequena horta. Só os sólidos muros de pedra dannos unha idea da súa vida anterior como almacén de apeiros agrícolas.
O seu propietario, Rubén Díaz Valcárcel, aproveitou a proximidade ao Camiño Francés deste inmoble, situado en Aldea de Abaixo, á saída de Palas de Rei, para darlle unha segunda vida. Respectou a estrutura orixinal do edificio para deseñar "un espazo aberto ao xardín cun amplo ventanal. O feito de que o cliente poida gozar desa aira exterior fai máis atractivo o apartamento. Convérteo nun aloxamento diferente a calquer outro", comenta o promotor do proxecto.
A interior conta cunha estancia, dividida en dous ambientes separados, por unha banda a cociña e a neveira e, por outro, unha ampla cama e un sofá que se pode utilizar como cama supletoria. "É posible aloxar ata tres persoas ou ben dous adultos e un neno", precisa Valcárcel. A única zona interior diferenciada é a do cuarto de baño e un pequeno recuncho para a lavadora.
Un 90% dos clientes que escolle este aloxamento son persoas con mascotas, que poden gozar o espazo exterior
O seu xardín converte ao Galpón Boutique nun aloxamento ideal para persoas con mascotas, un nicho de mercado no que está moi situado. "Un 90% dos clientes teñen can, xa que se trata dun sitio axeitado para que o animal se mova con libertade".
Outra das singularidades do Galpón Boutique é a súa pequena horta, onde o inquilino pode proverse de leitugas, tomates ou plantas aromáticas.
Esta vivenda turística non só está enfocada aos peregrinos, senón tamén a aquelas persoas que queiran pasar uns días nunha área rural, pero desde a que se poden desprazar en pouco tempo á capital da provincia, á Ribeira Sacra ou a Santiago.