Coa chegada do mes de maio o museo Terra de Melide reabriu as súas portas ao público, logo de estar pechado desde o pasado mes de decembro por mor dos seus escasos recursos económicos.
A falta de axudas, pois só recibe 20.000 euros de axuda da Deputación da Coruña, fai que a dirección só poida abonar oito meses de salario das súas dúas empregadas, polo que desde hai seis anos pecha entre os meses de decembro e abril.
A pesar destas penurias económicas, o centro prepara para esta tempada numerosas actividades no ámbito da investigación, a divulgación e a promoción da comarca de Melide. Neste sentido, xa teñen programadas diferentes iniciativas dirixidas a todo tipo de público. Entre elas, repiten algunhas que en pasadas edicións xa supuxeron todo un éxito de público, como é o caso das rutas guiadas polo centro histórico ou a ruta nocturna que se fai a través das lendas populares.
Para este ano, o centro procurará, ademais, poñer en marcha novas actividades, como unha serie de rutas a través dos restos megalíticos ou polos petróglifos que hai pola comarca, "e que iremos publicitando en tempo", segundo sinalan desde a entidade.
Cada tempada as cifras avalan o bo funcionamento deste museo e iso a pesar das escasas axudas públicas. Proba diso, é que entre maio e decembro do pasado ano, estas instalacións recibiron a visita de máis de 13.600 persoas, o que supón un incremento de case 3.000 con relación a 2017.
Moitos destes visitantes son peregrinos, polo que as súas nacionalidades son moi dispares.