Unha muller resultou este luns ferida tras unha colisión entre dous turismos no municipio de Antas de Ulla. O accidente produciuse ao redor das 15.00 horas, na estrada que conecta a capital municipal con Santa Mariña -o CP 302-, á altura do lugar de Gradoi.
Os vehículos viaxaban en direccións opostas por esta estrada e o choque entre eles foi frontolateral, o que produciu que un se desprazase ata a beiravía. A muller que resultou ferida, de 30 anos, viaxaba soa neste coche e foi trasladada nunha ambulancia ao Hula. Fontes do operativo de rescate destacaron que, aínda que se atopaba plenamente consciente, manifestaba unha gran dor tras a colisión.
Tras recibir o aviso do incidente, a central galega de urxencias do 112 mobilizou a axentes do subsector de Tráfico da Garda Civil e efectivos do GES de Monterroso, que colaboraron co 061 para situar á ferida na ambulancia, aínda que non foi necesaria a excarceración.
