Unha cuadra resultou calcinada en Melide por un incendio rexistrado na madrugada do venres ao sábado, un lume que causou a morte de dous tenreiros e que obrigou a traballar durante catro horas os equipos de extinción. Atendendo á información do 112, que recibiu a alerta pouco despois das cinco da madrugada, ocorreu na parroquia de San Xiao.
O lume, no que non resultou ferida ningunha persoa, arrasou por completo a cuadra e provocou danos importantes no teito. A alerta levou a mobilizar dotacións dos Bombeiros de Arzúa, que, xunto cos voluntarios de Protección Civil da localidade, traballaron horas na extinción. Ademais, contaron coa colaboración da Garda Civil.
Segundo os Bombeiros, foi posible rescatar a maior parte dos animais que estaban na cuadra, pero foi o dono quen se decatou da perda de dúas crías.
A cantidade de pacas de herba seca acumuladas no alpendre complicou o traballo dos equipos de urxencias. De feito, os Bombeiros tiveron que retiralas para asegurar a extinción do lume. Tamén lograron confinar o incendio, de forma que evitaron a súa propagación a outras estancias.
