Morre unha muller atrapada polo seu tractor en Palas de Rei

Unha veciña de Palas de Rei morreu este xoves ao quedar atrapada por un tractor no alpendre onde o gardaba, nas inmediacións do seu domicilio no lugar de Xermeade, pertencente á parroquia de Merlán. A falecida é María de los Ángeles Moreno Montecelo, de 53 anos, que pereceu esmagada polo vehículo agrícola contra unha columna de formigón. 

A sogra de Ángeles Moreno, que estaba na casa familiar próxima ao lugar do sinistro, atopou a súa nora accidentada e alertou do sinistro aos servizos de urxencia. Os sanitarios do 061 xa non puideron facer nada por salvarlle a vida. Tamén se desprazaron ao lugar persoal de Protección Civil de Palas de Rei, do Grupo de Emerxencias Supramunicipal (GES) de Monterroso, da Garda Civil e dos Bombeiros de Chantada. 

O suceso produciuse ás oito da tarde e descoñecíase se a falecida trataba de baixar cando a alcanzou o vehículo ou se intentou subir ao mesmo ao ver que se lle botaba enriba. Efectivos do GES de Monterroso encargáronse de mover a máquina agrícola co fin de proceder á excarceración do corpo. O levantamento do cadáver finalizou ás dez da noite. 

Ángeles Moreno estaba casada e é nai de dous fillos. A súa morte causou unha gran consternación na zona, onde a súa familia é moi coñecida, xa que o seu marido traballa para varias explotacións agrarias do municipio. O alcalde de Palas de Rei, Pablo Taboada, tamén expresou as súas condolencias aos seus familiares en nome propio e do Concello. 

Os accidentes de tractor provocaron tres mortes en 20 días na provincia de Lugo. O veciño Pedrafita Manuel Magdalena Carballo, de 77 anos, morreu a finais do mes de agosto ao envorcar o seu vehículo agrícola nunha parcela do lugar de Coterces, pertencente á parroquia de Liñares. O segundo sinistro mortal produciuse en Riotorto o pasado día 10, cando pereceu Ernesto González Sampedro, de 71 anos, que quedou atrapado debaixo do tractor que manexaba e que nese momento levaba un remolque cargado de leña. Ademais, o luns tamén sufriu feridas graves un home de 61 anos ao quedar tamén baixo un tractor en Bóveda.

Fóra da provincia de Lugo, esta mesma semana un sinistro similar custou outra vida en Castro Caldelas.