O Concello de Monterroso ampliou o seu programa de compostaxe, en colaboración con Sogama. A empresa pública proporcionoulle ao goberno local 37 composteiros, con 400 litros de capacidade e fabricados con materiais reciclados e reciclables, que se lles entregarán a outras tantas vivendas unifamiliares que dispoñan de terreo no que aplicar o compost resultante. Así se pecha o ciclo de recuperación da materia orgánica en orixe.
Estes composteiros, sumados aos 50 remitidos anos atrás, fan que o Concello dispoña dun total de 87.
Con esta medida trátase de recuperar unha práctica arraigada no medio rural, pero dunha forma máis cómoda e hixiénica, que trae consigo importantes beneficios ambientais e sociais.
Os residuos orgánicos representan en torno ao 42% da composición media dunha bolsa de lixo convencional. Con este sistema evítase o seu depósito nos colectores verdes convencionais, circunstancia que se traduce nunha redución da frecuencia do transporte e, xa que logo, da emisión de CO2 á atmosfera.
