O Concello de Melide celebra o nadal cun calendario cultural e deportivo que inclúe actividades durante todo o mes de decembro e a primeira semana de xaneiro.
O teatro será este sábado o protagonista coa representación da obra Nadal polo norte, da escola de teatro municipal. O venres 20 a quenda será para o alumnado e profesorado do conservatorio de música da vila. A música continuará o domingo día 22 co concerto de panxoliñas da coral polifónica.
O día 23 os máis pequenos poderán asistir ao taller 'A busca do apalpador'. Os talleres continuarán o día 26, con elaboración de xoguetes caseiros, e o venres 27, coa fabricación de adornos.
Unha das novidades desta edición será a actuación do monologuista J.J. Vaquero o sábado 28. O domingo 29 actuará o grupo Pavillón Lino e Suso de Boente, para os máis maiores.
Todas estas actividades celebraranse na casa da cultura, que acolle a exposición 'O fin do Camiño' ata o vindeiro mércores. O ano acabará coa tradicional San Silvestre, organizada pola asociación Cerne.
Durante o mes de xaneiro programaranse distintos talleres, e tamén actuará o humorista Cayetano Lledó. Ademais, a casa da cultura acollerá a visita dos Reis Magos nun belén vivente grazas á colaboración da asociación Charamela.
A programación de Nadal terminará coa gala de empresarios Terra de Melide o 10 de xaneiro ás 20.30 horas na casa da cultura, cando Eva Igrexas presentará o sorteo que repartirá 6.200 euros en premios para todas aquelas persoas que, ata ese día, comprasen nos distintos establecementos da vila.
