O concello de Melide acollerá do 7 ao 9 de decembro a sexta edición do seu Festival de Maxia, que contará coa presenza de oito ilusionistas. A alcaldesa, Dalia García, presentou este martes a programación desta cita acompañada do mago local Dani Polo e a concelleira de cultura, Dolores Gómez.
A cita arrincará o venres ás 16.00 horas cun espectáculo para os usuarios da residencia da terceira idade. Ás 19.30 horas celebrarase unha gala de maxia infantil na casa da cultura coa meiga Liñaxe e ás 22.00 horas tocará a quenda a unha demostración de ilusionismo na zona histórica.
O sábado as actividades comezarán ás 11.30 horas cun taller de maxia para nenos con idades superiores a oito anos na casa da cultura. É necesario inscribirse no Concello ou chamar ao número 981.50.50.03. A partir das 18.00 horas o mago Fernando Arribas ofrecerá un espectáculo para toda a familia. Para finalizar a xornada celebrarase ás 20.30 horas unha gala na que o ilusionista Yunke presentará o seu traballo Conjuro.
O domingo, na praza das Ichoas, Pedro Bugarín deleitará aos asistentes co seu espectáculo e, como é habitual, o festival clausurarase cunha gran gala internacional de maxia que se celebrará na casa da cultura coas actuacións de Dani Polo, Raúl Alegría, Fernando Arribas, Edama e David Díaz.
