Como ocorre cada 2 de maio desde hai cinco anos, o museo de Melide volveu a abrir, logo de permanecer pechado desde o pasado 31 de decembro. A falta de axudas que sofre a entidade obrígalle a ter que pechar eses catro meses, xa que os 20.000 euros anuais que recibe da Deputación da Coruña —o único organismo público que colabora co centro— só chegan para pagar oito meses de salario das dúas traballadoras.
Os responsables do centro tampouco prevén que a precaria situación económica da entidade vaia cambiar este ano, polo que todo indica a que cando chegue o próximo 31 de decembro a instalación volva ter que pechar.
O director do museo melidense, Xosé Manuel Broz, destaca con todo o sinalado que resulta este ano para a entidade, xa que celebra a súa 40 aniversario.
Entre os meses de maio e decembro do pasado ano, o museo de Melide recibiu a máis de 10.000 visitantes. Ademais, o Museo Arqueolóxico Nacional (MAN) incluíuno no boletín especial que editou en formato dixital, co título ‘150 anos de museos arqueolóxicos en España', o que foi considerado polos seus responsables «como todo un premio».
Os centros escolares que desexen realizar visitas ao museo poden formalizar as reservas chamando ao teléfono 981.50.79.98.
